Հայաստանի վարչապետը ֆեյսբուքյան ստատուսներով շարունակում է Վեհարանը վեհափառից ազատելու գործը: Այսօրվա գրառումից հասկանում ենք՝ իրավապահների համար Մայր Աթոռի տարածքում անհասանելի անկյուն չի կարող լինել: Բնականաբար նաև Վեհարանը, որտեղ կաթողիկոսի գրասենյակն է, բնակարանը:
Փաշինյանն, ի դեպ, Ամենայն հայոց կաթողիկոսի աշխարհիկ անունն է շաբաթներ ի վեր օգտագործում, բայց դեռ շատ չի վարժվել: Գրառման չխմբագրված տարբերակում՝ Կտրիճ Սարդարյան՝ խորհրդարանի նախկին պատգամավորի անունն էր նշել:
Գրոհ է նախապատրաստվում վեհարանի ուղղությամբ. ուզում են վեհափառին ձերբակալել, մտնելու են Վեհարան՝ խուզարկության. առավոտից ընդդիմադիրները այսկերպ են մեկնաբանում վարչապետի գրառումը:
Ազգային անվտանգության ծառայության շենքի մեկուսարանից արձագանքեց կալանավորված արքեպիսկոպոս Միքայել սրբազանը. - «Իմ նկատմամբ հատուկ ուղղորդմամբ ապօրինի քրեական հետապնդում պատվիրած և իմ կալանավորումը հրահանգած ոմն............... (լրացնել ըստ ճաշակի) հերթական սուտ և զրպարտչական հայտարարությունն է արել Վեհափառ Հայրապետի, իմ և Բագրատ սրբազանի հասցեին: Այս առնչությամբ կասեմ միայն, որ իմ համոզմամբ Բագրատ սրբազանը ոչ մի ահաբեկչական խմբավորում էլ չի ստեղծել: Հետևաբար ես չէի կարող գոյություն չունեցող որևէ բանի սատարել կամ մասնակցել, ուստիև Վեհափառ Հայրապետն էլ չէր կարող գոյություն չունեցող որևէ բանի հովանավորել: Հասկացա՞ր, այ.......... (լրացնել ըստ արժանվույն)»:
Ի դեպ՝ վարչապետ Փաշինյանը հուլիսի 1-ից վատ բառապաշարի հնգօրյա դադար էր առաջարկել, այս պահի դրությամբ արքեպիսկոպոսին դեռ չի արձագանքել:
ԿԱՐԴԱՑԵՔ ՆԱԵՎ Փաշինյանը խոստանում է հինգ օր «պարականոն բառապաշար» չկիրառելԱջապահյանի փաստաբանները նույնպես այս վերջին գրառումը իրավապահներին ուղղված պատվեր են համարում. - «Միքայել սրբազանի պաշտպանական թիմը Նիկոլ Փաշինյանի այս հայտարարությունը գնահատում է, որպես դատախազությանը և քննչական մարմնին ուղղված պատվեր կամ հանձնարարություն՝ Մայր Աթոռում դատավարական գործողություններ (խուզարկություն կամ ձերբակալություն) իրականացնելու վերաբերյալ»:
«Ես չեմ կարծում, որ դրա մասին է, քանի որ մենք ունեցել ենք երևույթ, որ իրավապահները փորձել են գործողություններ իրականացնել Էջմիածնի տարածքում, ցավոք, որովհետև անձը, որը պետք է ներկայանար իրավապահ մարմիններին, թաքնվել էր, ըստ էության, եկեղեցու տարածքում», - «Քաղաքացիական պայմանագիր» խմբակցության քարտուղարը վստահ է՝ վարչապետը ոչ թե հաջորդ այլ նախորդ՝ հունիս 27 -ի իրադարձությունների մասին է խոսում, երբ ուժայինները Մայր Աթոռ էին գնացել Շիրակի թեմի առաջնորդին ձերբակալելու, հավաքված մարդիկ թույլ չէին տալիս, որ հոգևորականը հեռանա Վեհարանի տարածքից:
Միքայել սրբազանը չի թաքնվել և ի վերջո իր ոտքով գնացել է Քննչական կոմիտե, պնդում էին արքեպիսկոպոսի փաստաբանները:
ԿԱՐԴԱՑԵՔ ՆԱԵՎ Միքայել արքեպիսկոպոսը երկու ամսով կալանավորվեցԵրբ երկրի վարչապետը գրում է՝ Վաղարշապատի որևէ տարածք չի կարող իրավապահների գործունեության համար փակ լինել, սա ցուցում չէ՞ հենց իրավապահներին՝ Արթուր Հովհաննիսյանը չի կարծում, որ Նիկոլ Փաշինյանը զբաղված է իրավապահների գործողությունները անոնսելով:
Որ վերջին շրջանում Նիկոլ Փաշինյանի ֆեյսբուքյան ստատուսներն ու իրավապահների գործողությունները համահունչ են, խորհրդարանական ընդդիմությունն է պարբերաբար բարձրաձայնում: Այսօր էլ «Հայաստան» խմբակցությունից Քրիստինե Վարդանյանը գլխավոր դատախազին ուղիղ հարց ուներ. - «Հիմա հրահանգնքները SMS-ով եք ստանո՞ւմ, թե՞ մենակ ստատուսներն եք կարդում»:
Մի քանի ընդդիմադիրների անձեռնմխելիությունից զրկելու միջնորդությամբ խորհրդարան եկած գլխավոր դատախազին նաև հարցրին՝ վեհափառ հայրապետի նկատմամբ գործողություն իրականացնելո՞ւ եք:
«Որևէ անձի վերաբերյալ այո կամ ոչ, բերելու եմ, տանելու եմ, մեղադրելու ենք կամ չենք մեղադրելու, ոչ մի կանխատեսական դատողություն չեմ անելու», - պատասխանեց Աննա Վարդապետյանը:
Նիկոլ Փաշինյանի ձեռնարկած հակակաթողիկոսական արշավի 39-րդ օրն է: Վեհափառը դեռ Վեհարանում է, Մայր Աթոռում ու այլ եկեղեցիներում ամենօրյա պատարագներ են, թանգարաններից պարբերաբար հավատացյալներին կանչող մասունքներ են դուրս բերվում: Զուգահեռ՝ իշխանական դեմքերը պնդում են՝ հեռանալու է կաթողիկոսը, միայն թե ոչ ոք առայժմ չի բացատրել, թե ինչպես: Գործող հոգևորականներից որևէ մեկը հրապարակավ չի միացել վարչապետի արշավին:
Երկու օր առաջ համատեղ հայտարարություն տարածեցին հայաստանյան ու սփյուռքի եպիսկոպոսներն ու թեմերի առաջնորդները. - «Որդիական խոնարհությամբ մեր հավատարմությունն ենք հայտնում Հայոց Եկեղեցու ազգընտիր գահակալին՝ Գարեգին Բ Ամենայն Հայոց Կաթողիկոսին։ Հայոց Եկեղեցին, բարձրագույն մարմին ունենալով Ազգային-Եկեղեցական ժողովը, հետայսու ևս ղեկավարվելու է դարերով սրբագործված իր ընթացակարգերով՝ բացառելով արտաքին որևէ միջամտություն»։
Ի դեպ՝ Մայր Աթոռի եպիսկոպոսներից տեղեկացանք, որ այս հայտարարությանը նախորդած ժամանակահատվածում հեռախոսային հաղորդագրություն են ստացել իրենց անծանոթ համարից՝ SMS-ը հղում է ունեցել, որում վարչապետի աշխատակազմի ղեկավար Արայիկ Հարությունյանի գրառումն էր՝ «հոգևորականները պետք է քննարկեն Կտրիճ Ներսիսյանի անխուսափելի հեռացումից հետո Եկեղեցին ինչպես է գործելու, ով է լինելու տեղապահ և ինչպես է ընթանալու Մայր Աթոռի բարենորոգության գործընթացը»:
Ո՞վ է էջմիածնական վերնախավին ուղարկել այս SMS ուղերձը. եպիսկոպոսներն իրենք չգիտեն, Արայիկ Հարությունյանը «Ազատությանը» փոխանցեց՝ ոչ ոքի SMS չի ուղարկել, բայց որ պետք լինի կուղարկի: